Gjykata italiane dënon mjekun për vdekjen e ish-kapitenit të Fiorentinës Davide Astori

Një gjykatë në Itali dënoi me një vit burg mjekun sportiv që kujdesej për skuadrën e Fiorentinës në periudhën kur kapiteni Davide Astori humbi jetën si pasojë e një arresti kardiak.

Giorgio Galanti ishte i vetmi i pandehur në çështjen e ngritur nga prokuroria italiane për rastin e 4 marsit 2018 që tronditi botën e futbollit.

Astori u nda nga jeta në moshën 31-vjeçare pak përpara një ndeshjeje të Serie-A kundër Udineses. Shokët e skuadrës e gjetën të pajetë në dhomën e hotelit. Sipas autopsisë ai u godit nga një aritmi teksa ishte në gjendje gjumi.

Doktori Galanti, asokohe drejtues i stafit mjekësor të spitalit Careggi në Firence, ishte personi i fundit që e kishte vizituar Astorin verën e vitit 2017 – shtatë muaj para vdekjes, – dhe i kishte dhënë atij dritën jeshile për të vijuar aktivitetet sportive.

Gjykata vendosi të hënën se Galanti ishte përgjegjës për shëndetin e lojtarëve dhe duhej ta kishte parandaluar vijimin e karrierës së Astorit përballë situatës shëndetësore që kishte. Për këtë atij iu dha një vit burg, që u kalua në dënim me kusht dhe paralelisht një gjobë prej 1 milionë euro si detyrim për t’i paguar familjes së Astorit.

Avokatët e Galantit kundërshtuan vendimin dhe thanë se çështja do të kalojë në apel. Avokati i tij, Sigfrido Fenyes tha se mjeku “ka bërë në mënyrë korrekte detyrën”.

Vdekja e Astorit tronditi botën e futbollit italian, teksa kapiteni i Fiorentinës ishte edhe lojtar i kombëtares.