Gjykata Kushtetuese nis punën për të zgjedhur kryetarin e ri

Mbledhja e anëtarëve të Gjykatës Kushtetuese ka zgjatur më shumë se pesë orë dhe mësohet se është vendosur të fillojë procesi i hartimit të rregullave procedurale e administrative në funksion të zgjedhjes së Kryetarit të Gjykatës.

Po ashtu Vitore Tusha në cilësinë e gjyqtarit me të vjetër në detyrë do të vijojë ushtrimin e kompetencave të kryetarit, deri në përfundimin e procesit të zgjedhjes së kryetarit të ri.

Mbledhja e gjyqtarëve vendosi të caktojë edhe përbërjen e tre kolegjeve për vitin 2021 si dhe të caktojë kalendarin e çështjeve për shqyrtim në seancë plenare duke pasur parasysh jo vetëm rendin kronologjik të çështjeve të mbartura, por edhe natyrën dhe rëndësinë e tyre.

Burime pranë kësaj gjykate bëjnë me dije se gjykimi i çështjeve mendohet të nisë nga java e ardhshme dhe deri në muajin shkurt pritet të shqyrtohen të paktën 20 dosje.

 Krahas çështjeve të nxehta si zgjedhjet e 30 qershorit, ligjit për shembjen e Teatrit Kombëtar apo ndryshimet në Kodin Zgjedhor, anëtarët e Gjykatës Kushtetuese pritet të shqyrtojnë edhe kërkesën e kryeministrit Edi Rama për mosmarrëveshjet me Presidentin Meta lidhur me emërimin dhe shkarkimin e ministrave, përplasje që nisi pas refuzimit të dekretimit të Gent Cakajt, si ministër të Jashtëm.

Gjykata Kushtetuese në përbërjen e saj ka shtatë anëtarë, por funksionimi i plotë sipas Kushtetutës sanksionon të ketë nëntë të tillë.

Bërja funksionale e Kushtetueses brenda 2020 ishte një kërkesë e ambasadorëve të SHBA dhe të Bashkimit Evropian, të cilët inkurajuan palët e përfshira në këtë proces, të bashkëpunojnë ngushtë për t’i dhënë vendit një gjykatë funksionale, objektiv ky, i cili tashmë është arritur.

Lexoni gjithashtu: 

Sonila Bejtja betohet sot para presidentit Meta, si anëtare e Gjykatës Kushtetuese

Vakanca në Kushtetuese, sot mblidhet Këshilli i Emërimeve në Drejtësi

Presidenti Ilir Meta dekreton anëtarin e shtatë të Gjykatës Kushtetuese

Ambasadorët Soreca dhe Kim përshëndesin emërimin e gjyqtarit të 7-të Kushtetuese

Vakancat në Gjykatën Kushtetuese, KED i çon emrin e radhës presidentit Meta

Ekskluzive/ Ambasadorja Yuri Kim: Gjykata Kushtetuese është funksionale, mos u shpërqendroni nga propaganda dhe konspiracionet