Gjykata Kushtetuese rrëzoi herësin, ish-këshilltari Mustafaj: Nuk do të thotë se listat janë hapur

Dardan Mustafaj, ish-këshilltar i Gjykatës Kushtetuese tha për Euronews Albania se vendimi i Gjykatës Kushtetuese, i cili shfuqizoi herësin në shpërndarjen e mandateve për deputetë, nuk do të thotë se listat janë hapur.

Sipas z. Mustafaj, vendimi i një dite më parë nuk tregon se tashmë vullneti i qytetarëve do të përcaktojnë kandidatët në listat për deputetë.

Kandidatët në lista përcaktohen sipas renditjes së partive, nënvizoi z. Mustafaj, teksa shtoi se i vetmi nen që është shfuqizuar është ai që thoshte se ai kandidat që thyente herësin prej 10 mijë votash, mund të merrte mandatin e deputetit.

Z. Mustafaj theksoi se vendimi i Kushtetueses nuk do të ketë ndonjë ndikim tek zgjedhjet e kaluara. Sipas tij, Kushtetuesja duket se nuk i ka konsideruar shkeljet në atë masë sa për t’i shfuqizuar zgjedhjet.

Gjykata Kushtetuese vendosi të shfuqizojë më 30 qershor pikën 3 të Nenit 163 në Kodin Zgjedhor, i cili flet për herësin në shpërndarjen e mandateve për deputetë.

Kjo pikë parashikonte që kandidatët, të cilët mund të ishin vendosur në listën e sigurt të kryetarëve të partive, mund të rrezikonin vendin në parlament vetëm në rastin kur kandidatët e tjerë të renditur më poshtë siguronin vota sa mesatarja që i është dashur partisë për të siguruar një mandat herësi.

LEXONI GJITHASHTU:

• Gjykata Kushtetuese rrëzon mënyrën e shpërndarjes së mandateve, shfuqizon kriterin e herësit
• Kodi Zgjedhor, ‘Kushtetuesja’ cakton seancën për kërkesën e Bindjes Demokratike dhe partisë së Murrizit