Gjykata lë në burg 2 shokët e Aldi Ramës, avokati: Nuk kanë lidhje me vrasësin

Gjykata ka dhënë masën e sigurisë arrest me burg për 2 të rinjtë, Armando Marku dhe Kristian Sherri, të cilët ishin në të njëjtin automjet me 21-vjeçarin Aldi Rama ditën që ai vrau me armë zjarri nënkomisarin Saimir Hoxha në Lezhë. Dy të rinjtë gjendeshin në vendet e para të automjetit që u ndalua nga grupi i policëve, mes të cilëve edhe efektivi i vrarë.

Policia sqaroi në një njoftim zyrtar pas ngjarjes se 2 të rinjtë i ishin bindur urdhrit të policisë për të ndaluar dhe për t’u kontrolluar. 21-vjeçari Aldi Rama, i cili ndodhej në sediljen e pasme të mjetit, urdhrit të efektivit Hoxha për t’i treguar dokumentin e identifikimit iu përgjigj me plumba.

Ndërkohë, avokati i të arrestuarve tha për mediat se vendimi gjykatës është në mbrojtje të veprimeve të paligjshme të policisë, të cilët në momentin e ndalimit të makinës së të rinjve nuk kishin asnjë shenjë dalluese.

“Policët ishin pa asnjë shenjë dalluese kur ndaluan makinën e të rinjve. Gjykata po mbron veprimet e paligjshme të policisë. Nuk kanë lidhje me Aldi Ramën, ndryshe do kishin ikur bashkë me të”, u shpreh avokati i të rinjve.

Ngjarja e rëndë ndodhi 2 ditë më parë kur Rama qëlloi me armë zjarri policin 45-vjeçar nga brenda makinës ku ndodhej, ndërsa Hoxha e ndaloi për t’i kontrolluar kartën e identitetit në kuadër të një operacioni anti-drogë.

LEXONI GJITHASHTU:

• ‘Unë nuk jam për t’u kontrolluar’, policia zbardh vrasjen e efektivit Hoxha
• Gazetari Julian Kasapi tregon detaje për ngjarjen ku u vra nënkomisari i Policisë