Gjyqi ndaj drejtuesve të UÇK-së, nesër mbahet konferenca për ecurinë e çështjes së Thaçit, Krasniqit, Veselit, Selimit

Dhomat e specializuara kanë njoftuar se ditën e nesërme në orën 11.00  do të mbahet në Hagë Konferenca për ecurinë e çështjes në ngarkim të Hashim Thaçit, Jakup Krasniqit, Kadri Veselit dhe Rexhep Selimit.

Në paraqitjen e parë para trupit gjykues Thaçi, Krasniqi, Veseli dhe Selimi u deklaruan të pafajshëm për cdo akuzë të ngritur ndaj tyre.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.

Sipas akuzës, së paku midis marsit 1998 deri në shtator 1999, Hashim Thaçi, Kadri Veseli, Rexhep Selimi, Jakup Krasniqi dhe anëtarë të tjerë të UÇK kishin qëllimin e përbashkët për të siguruar dhe ushtruar kontroll mbi të gjithë Kosovën përmes metodave që përfshinin frikësimin, keqtrajtimin, ushtrimin e dhunës dhe eliminimin e paligjshëm të atyre që konsideroheshin si kundërshtarë.

Në aktakuzë përmenden edhe Latif Gashi,  Azem Syla, Lahi Brahimaj, Fatmir Limaj, Sylejman Selimi, Rrustem Mustafa, Shukri Buja, dhe  Sabit Geci.