Gjyqtarët që i ulën dënimin Dritan Dajtit kërkojnë kthimin e parave të sekuestruara nga gjykata

Vendimi i GJKKO që pushoi hetimet për korrupsion ndaj tre gjyqtarëve që pranuan kërkesën e Dritan Dajtit për gjykim të shkurtuar, duket se nuk mjafton për ta. Me një kërkesë drejtuar gjykatës speciale tre gjyqtarët  kërkojnë kthimin e shumës prej 18 mijë eurosh që iu sekuestruan në banesa dhe disa sende personale.

Vendimi i gjykatës thekson se shuma prej 17 mijë euro që iu gjet gjyqtarit Skënder Damini dhe djalit të tij, do të vijojë të jetë e sekuestruar për shkak se ndaj gjyqtarit ka nisur hetim pasuror. Po kështu nën sekuestro do të qëndrojnë edhe 1 mijë e 700 euro që iu gjetën gjyqtarit Petrit Aliaj, por edhe një telefon celular në pronësi të Aleks Nikollit.

Por, kundër këtij vendimi krahas gjyqtarëve është edhe SPAK-u, i cili me një kërkesë drejtuar GJKKO ka ankimuar sekuestron ndaj gjyqtarëve Skënder Damini, Petrit Aliaj e  Aleks Nikolli.

Sipas Prokurorisë Speciale për sa kohë u provua që pasuritë janë të ligjshme dhe hetimi për korrupsion pushoi gjyqtarëve duhet t’u kthehen shumat monetare dhe telefonat.

Dritan Dajti u dënua me burgim të përjetshëm për vrasjen e katër punonjësve të policisë në gusht të 2009-s. Ndërsa shkurtin e kaluar treshja e gjyqtarëve të Apelit pranuan kërkesën e Dajtiti duke e dënuar atë me 25 vite burgim.