Goditet rafinaria e madhe e naftës në Kuvajt

Një rafineri nafte në Kuvajt është goditur nga dronë gjatë së premtes, bëjnë të ditur autoritetet vendase përmes agjencisë shtetërore të lajmeve.

Kompania shtetërore e naftës, Kuwait Petroleum Corporation, njoftoi se rafineria Mina al-Ahmadi është shënjestruar nga sulmi ajror. Sipas të dhënave paraprake, nga goditja janë shkaktuar zjarre në disa njësi operative të kompleksit industrial.

Agjencia KUNA raportoi se ekipet e emergjencës kanë ndërhyrë menjëherë dhe po punojnë për të vënë nën kontroll flakët, ndërsa vijon vlerësimi i dëmeve.

Deri më tani nuk ka informacion të detajuar për viktima apo përmasat e plota të dëmit, ndërsa autoritetet nuk kanë dhënë ende detaje mbi origjinën e sulmit.