Grabitja e miliona eurove në Rinas, lirohen dy prej të dënuarve

Gjykata e Apelit të Posaçëm ka vendosur të lirojë dy nga të penduarit e dosjes së grabitjes së blindave me para. Admir Çerpja, i dënuar me 5 vite e 8 muaj burg në vitin 2019, u la i lirë nga gjykata. Ai u arrestua në vitin 2017 si i përfshirë në grabitjen e blindave me para që shkonin drejt Rinasit.

Çerpja përfitoi ulje të dënimit për shkak të ndihmës që dha me dëshminë e tij në zbardhjen e ngjarjeve. Për shkak statusit si bashkëpunëtor i drejtësisë, dhe përfundimit të dënimit lirinë ka fituar edhe ish-komando Ditjon Memlika.

Në dy grabitje të ndryshme të ndodhur në dhjetor 2015 dhe shkurt 2017 dyshohet se në automjete blind që po transportonin para të disa bankave të nivelit të dytë në Shqipëri drejt aeroportit të Rinasit janë marrë miliona euro.

Çerpja ishte një prej tyre që pranoi se kishte marrë pjesë në grabitjen me armë por që roli i tij ka qenë si “informator”. Në bazë të deklarimeve të tij dhe hetimeve të prokurorisë, ai ka marrë nga rreth 100 mijë dollarë për secilën grabitje.