Përkeqësohet gjendja e naftëtarëve në grevë, Dautaj: Qeveria po na shpërfill

Në një intervistë për Euronews Albania, kryetari i Sindikatës së Naftëtarëve, Sokol Dautaj dhe njëkohësisht zëdhënës i Komunitetit të Grevës shprehu shqetësimin sa i takon gjendjes shëndetësore të naftëtarëve.

Z. Dautaj solli në vëmendje profilin e tyre të punës që vjen me sëmundje të mbartura e duke marrë parasysh që ambienti është në lagështi dhe janë në ditën e nëntë të protestës gjendja është shumë e rënduar.

Pyetur se për cilën arsye nuk po i marrin dot pagat të cilat janë miratuar me vendim gjykate, Sokol Dautaj tha se në ambientet e rafinerisë mbahen shumë prej dokumenteve të rëndësishme përfshirë këtu edhe librezat e punës që sipas tij bëhet qëllimisht që naftëtarët mos të marrin asistencë apo ndihmë ekonomike.

“Të jesh nëntë ditë në grevë urie e mos të marrësh përgjigje nga organet kompetente”,- u shpreh Dautaj teksa theksoi se indiferenca e organeve është ajo që po i vret më shumë.

Ndërkaq sa i përket firmës pronare aktuale të rafinerisë zëdhënësi i Komunitetit të Grevës tha se nuk është bërë gjë tjetër veçse një ‘çorbë’ që sipas tij është bërë në dijeni të shtetit.

“Këta kanë sjellë kompani pafund, njëra falimentonte tjetrën e me radhë dhe ndaj naftëtarët janë të çoroditur”,- tha Dautaj teksa theksoi se nëse shteti nuk do të ishte i vetëdijshëm për situatën atëherë do të kishte pasur një reagim.

 Së fundmi ai nënvizoi se kërkojnë vëmendjen e organeve kompetente dhe se kjo situatë nuk mund të vazhdojë sa herë të ndërrohen firmat që marrin rafinerinë në pronësi.

Lexoni gjithashtu: 

“Kërkojmë gjakun dhe djersën tonë”, naftëtarët e Ballshit në grevë urie: Na vjen zor të shkojmë në shtëpi

Naftëtarët e Ballshit në grevë, Sokol Dautaj: Jemi rrugëve dhe pa asnjë përkrahje ekonomike

Naftëtarët në grevë urie, pas dy javë protestash për rrogat e prapambetura

Protesta e naftëtarëve, Ëngjëllushe Zenelaj: Vetëm roli rregullator i shtetit mund t’i japë zgjidhje situatës