Greva e punonjësve të ‘Albcontrol’, kontrollorët e rajonit kërkesë autoriteteve shqiptare: Uluni në dialog

Për grevën e kontrollorëve shqiptarë në Rinas, ka reaguar edhe Unioni i Kontrollorëve të Rajonit. Kontrollorët nga Sllovenia, Kroacia, Bosnja, Maqedonia e Veriut, Bosnja, Serbia dhe Mali i Zi janë solidarizuar me kolegët e tyre në Shqipëri, duke bërë thirrje për dialog.

Në letrën e tyre, kontrollorët e rajonit shprehen se keqtrajtimi dhe burgosja e punonjësve të ‘Albcontrol’ nuk i japin zgjidhje kësaj situate. Më tej në letër ata shprehen se kushtet e punës për kontrollorët janë parakushti më i rëndësishëm për një trafik ajror të sigurt dhe nxisin negociata mes palëve për një zgjidhje.

Në një komunikatë për shtyp, Një ditë më parë Unioni Europian i Kontrollorëve shprehu shqetësim për trajtimin e kolegëve shqiptarë, duke kërkuar lirimin e menjëhershëm të punonjësve të arrestuar.

“Albcontrol ka ulur në mënyrë të njëanshme pagat e punonjësve, pa u konsultuar ose pa biseduar me shoqatat që përfaqësojnë punonjësit. Ata kanë refuzuar të negociojnë një marrëveshje për zgjidhjen e krizës.

Si mund Shqipëria të shohë një të ardhme të re dhe të ndritur si vend anëtar i BE-së, kur mënyra si reagon ndaj punonjësve që kërkojnë të drejtat e tyre themelore, të kujton një të shkuar të errët staliniste”, shkruhej në komunikatën e Unionit Europian të Kontrollorëve.