Grida Duma: Me rreth 36 mijë vota diferencë nga PD, PS duhet të merrte vetëm 4 mandate dhe jo 11

Grida Duma, e ftuar në studion e “Ilva Now” foli mbi rezultatin e PD-së në zgjedhjet e 25 prillit, duke u ndalur te vetë Partia Demokratike si parti, për të analizuar problemet e brendshme të kësaj partie.

Znj. Duma tha se pavarësisht se PD-ja duhet të reflektojnë mbi rrugën që ndoqi për zgjedhjet, së pari duhet parë se cili ishte shembulli u kundërshtarit i cili, ndryshe nga PD-ja, fitoi zgjedhjet e 25 prillit.

“Në këtë vend nuk ka rëndësi sesi je i suksesshëm, mjafton të jesh dhe krijon një model. Kjo e ka lënë Shqipërinë në tranzicion 30 vite. Negociatë me vlerat, nuk ka rëndësi si u bë i pasur, e rëndësishme është që ja arriti. Kjo është Shqipëria që duam ne?”, tha znj. Duma.

Grida Duma u shpreh se reflektimi primar që duhet të bëjë PD-ja, është ai mbi rrugën që ndoqi drejt fitores që kërkonte në këto zgjedhjeve. Sipas znj. Duma, PD-ja nuk ka shkelur parimet e saj, duke mos bërë negociata me vlerat demokratike.

“Kur PD-ja të bëjë reflektimin e saj, ne reflektim duhet të jetë se cilat parime ndoqi përgjatë rrugëtimit të saj drejt fitores së zgjedhjeve. Parimisht a duhej që PD-ja të bënte negociatë me vlerat e mëdha?, tha znj. Duma.

A duhej të fuste duart e e bandave kriminale dhe t’i përdorte për të fituar zgjedhjet? Për mua që nuk e bëri, e ka shpëtuar Shqipërinë, sepse do të kishim legjitimuar të njëjtin model që po godasim”, shtoi ajo.

Për rezultatin në zgjedhje, znj. Duma tha se PD-ja nuk ka përdorur mjete jo parimore, ndryshe nga PS-ja, për të cilën znj. Duma pretendoi se i ka fituar zgjedhjet me anë të mjeteve korruptive, përderisa ka pasur pushtet.

Znj. Duma shtoi se edhe sistemi ka ndikuar që mandatet e PS-së dhe PD-së të ndaheshin me një diferencë të tillë, pasi sipas saj, për 36 mijë vota diferencë, PS-ka nuk duhet të merrte 11, por rreth katër mandate. Për këto arsye, sipas Grida Dumës, rezultati i PD-së në zgjedhje është i kënaqshëm.

“Pa pasur asnjë pushtet, të arrish të ndahesh me PS-në me 37 mijë vota dhe nga këto vota të marrë PS 11 mandate kur me herësin nuk kapte të katërtin, do të thotë që kjo forcë politike (PD) pa asnjë pushtet, e përballur me të gjitha pushtetet, si një ushtri pa armë, e përballur nga një ushtri të kalbur nga brenda por që ka të gjitha armët, ka marrë shumë besim. Njerëzit nuk duan më negociatë me vlerat”, u shpreh znj. Duma.