Grida Duma për aleancën me LSI-në: Ne jemi opozita dhe shërbejmë si front kombëtar

Grida Duma tha në studion e “Ilva Now” se aleanca me LSI-në vazhdon, përderisa janë ende në opozitë. Për znj. Duma, e gjithë opozita funksionon si front kombëtar.

“Ne jemi opozita, për sa kohë që edhe LSI është opozita atëherë aleanca vazhdon. Është një front kombëtar ky dhe PD-ja kur i bëri ekuilibrat e vet, i futi të gjithë aleatët me idenë e qartë për të treguar se fronti opozitar ishin bashkë” u shpreh znj. Duma.

Në lidhje me hyrjen në zgjedhje me lista të ndara me LSI-në, znj. Duma tha se ky ka qenë vendim i LSI-së, të cilin PD-ja e ka respektuar, pavarësisht se mund të mos ketë qenë vendimi më i mirë.

“Ne respektuam vendimin e tyre për të pasur listën më vete. Kjo është një zgjedhje e tyre. Marzhi i gabimit në vendimmarrje është gjithmonë brenda”, u shpreh znj. Duma.

Grida Duma tha se nuk e diskuton faktin që LSI-ja është opozitare e kryeministrit Rama dhe se ka besim te plotë mbi sjelljen e komisionerëve të LSI-së gjatë procesit të votimit dhe numërimit.

“Unë nuk diskutoj në qëllimshmërinë e LSI-së për asnjë moment. E di se ata janë opozitarë të jashtëzakonshëm të Edi Ramës dhe janë ende. Komisionerët e LSI-së dhe të PD-së kanë qenë unit  totalisht”, tha znj. Duma.

Grida Duma tha gjithashtu se Lulzim Basha respektoi dhe vendosi në fillim të listës njerëz që i qëndruan tetë vite në opozitë.

“Kushdo që nuk e respekton mirënjohjen është me terma afatshkurtër”, u shpreh znj. Duma.