Grupi i artistëve realizon “grafiti” përpara publikut në shesh

Një grup shokësh që i bashkon pasioni për grafitin, kanë pikturuar në ambiente të hapura këtë të diel, profile të personazheve të ndryshëm.

Kjo formë arti jo shumë e njohur në Shqipëri, po fillon të përhapet dalëngadalë dhe ky është edhe qëllimi i grupit Tr Graff; për ta bërë të njohur këtë formë, e cila synon të komunikojë gjithmonë me hapësira urbane.

Grafiti është konsideruar si art ilegal, apo si një formë vandalizmi, por jo për artistët që pasionin për Grafitin e kanë nisur qëkur kanë qenë fëmijë.

Në aktivitetin e djeshëm, veç artistëve  për të shijuar performancën e të bërit një grafiti, ishin dhe shumë të rinj që e pëlqejnë këtë formë të të tejçuarit të mesazheve.

Për grupin Tr Graff ky është aktiviteti i parë që mbajnë në një ambient të hapur dhe me një publik të rastësishëm, duke treguar që ky art në fakt rivitalizon të gjitha ato hapësira të vjetra apo të braktisura.