Gucati lihet në paraburgim, avokati kërkoi lirimin me kusht të kreut të OVL-së

Kryetari i Organizatës së Veteranëve të luftës së Ushtrisë Çlirimtare te Kosovës, Hysni Gucati doli dje për herë të parë para Gjykatës së Dhomave të Specializuara në Hagë. Në fjalën e tij para gjykatës special ai kundërshtoi formën e arrestimit të tij nga EULEX.

Avokati mbrojtës kërkoi lirimin me kusht të klientit të tij, duke parashtruar katër ankesa që kundërshtonin legjitimitetin e arrestimit dhe dërgimit të tij në paraburgimin e Hagës.

Avokati përmendi edhe një garanci prej 5 mijë eurosh, që Gucati të jetojë në një adresë të caktuar në Kosovë dhe të raportojë në policinë e EULEX-it.

Prokuroria e Specializuar e cilësoi të nevojshme qëndrimin në paraburgim të Gucatit, me argumentit se ai mund t’i “shmangej drejtësisë”, por edhe të përsërisë veprat të cilat dyshohet se i ka kryer. Pritet që brenda 30 ditësh Zyra e Prokurorit të ngrejë aktakuzën për Gucatin.

Kreu i organizatës së veteranëve të luftës së UÇK-së Hysni Gucati, dyshohet për pengim të drejtësisë dhe kanosje të dëshmitarëve, nga rrjedhja e disa dosjeve konfidenciale të krimeve të luftës.

Ai u arrestua në Prishtinë më 25 shtator, në zyrat e Organizatës së Veteranëve të luftës. Akuza mori shkas nga 3 konferenca për media të krerëve të organizatës së veteranëve të luftës, ku pretendohet se u shpërndanë materiale konfidenciale të Gjykatës Speciale.