Hapen 6 pika testimi të shpejtë në Tiranë, Manastirliu: Mjeku i familjes rezervon testimin e shpejtë

Ministrja e Shëndetësisë dhe Mbrojtjes Sociale Ogerta Manastirliu, nga Qendra Shëndetësore Nr.9, ka bërë me dije se testimi i shpejtë ka nisur në 6 pika në Qendra Shëndetësore në Tiranë dhe rezervimi për kryerjen e tyre tashmë do të bëhet nga mjekët e familjes.

“Sot kemi filluar me testimin e shpejtë në Tiranë, në komunitet, në 6 pika të identifikuara për të kryer testimet në komunitet sipas një sistemi të mirëorganizuar me mjekun e familjes, me regjistrin elektronik të fashave orare, ku qytetarët të cilët janë pjesë e indikacioneve, pra për 5 ditët e para të sëmundjes dhe ku mjeku i familjes vlerëson se duhet kryer testimin e shpejtë, vijnë në këto qendra shëndetësore”, tha Manastirliu.

Ajo deklaroi se do të vijojnë të shtojnë kapacitetet dhe testimi i shpejtë do të vijojë në gjithë Shqipërinë.

Kjo metodë e vaksinimit nuk do të zëvendësojë testimin me metodën klasike të PCR, i cili do vijojë.

Së fundmi Manastirliu apeloi që qytetarët të shmangin grumbullimet gjatë festave të fundvitit dhe të festojnë brenda rrethit të ngushtë familjar për të shmangur përhapjen e COVID-19.

 “Është shumë e rëndësishme tashmë që vijnë edhe festat e fundvitit, të jemi të gjithë sa më shumë vigjilentë dhe të impenjuar për të ruajtur masat e distancimit social, vendosjen e maskës, ruajtja e higjienës”, përfundoi Ministrja.