Nisin fluturimet me Italinë, por ende ka kufizime për shqiptarët

Shqiptarët që ndodhen në Itali si dhe çdo qytetar tjetër, nisur nga sot kanë mundësi të vijnë drejt Shqipërisë përmes ajrit.

Ndërsa nga Shqipëria drejt Italisë nisja e fluturimeve nga Aeroporti Ndërkombëtar i Tiranës është ende e kufizuar.

Personat e lejuar që mund të fluturojnë nga Shqipëria drejt Italisë janë:

Pasagjerët rezident

Pasagjerët që udhëtojnë për qëllime biznesi

Pasagjerët që udhëtojnë për arsye shëndetësore

Drita jeshile për rinisjen e fluturimeve të rregullta ka bërë që sot aeroporti Ndërkombëtar i Tiranës të ketë katër destinacione drejt Italisë, përkatësisht në Firence, Milano, Bari dhe Venecia.

Me përjashtim të shteteve si Serbia, Greqia dhe Austria, vende me të cilat Shqipëria i ka hapur kufijtë që nga 15 qershori, tashmë kanë nisur fluturimet edhe me shtetin Turk. Aeroporti i Stambollit është i vetmi, i cili ka hapur kufijtë pa kufizime për të gjithë pasagjerët.

Sa i përket nisjes së fluturimeve pa asnjë kufizim drejt vendeve evropiane, Komisioni Evropian ka rekomanduar që për Ballkanin kjo të mundësohet në fillim të muajit korrik.