Hapet në Danimarkë muzeu për refugjatët, që nga Lufta II Botërore

Në Danimarkë u përurua një muze i ri dedikuar refugjatëve që e kanë kthyer shtetin nordik në shtëpinë e tyre.

Muzeu me emrin “Flugt” u ngrit në vendin e një ish-kampi refugjatësh në Oksboel, një qytezë pranë bregut perëndimor të Danimarkës, 95 kilometra nga kufiri me Gjermaninë.

Ai synon të tregojë historinë e fluksit më të madh të refugjatëve që Danimarka ka parë ndonjëherë, atë të 250 mijë gjermanëve në fund të Luftës së Dytë Botërore.

“Kur dëgjon për refugjatët nëpër botë sot, dëgjon të flitet për numra të lartë, për shifra të pasakta dhe ndonjëherë për njerëz të shumtë që po vijnë në vendin tuaj. Por ne duam të tregojmë historinë prapa këtyre numrave, sepse ata janë njerëz”, thotë Claus Kjeld Jensen, drejtor i muzeut.

Drejtuesi i muzeut tha se do të pasqyrojë edhe emigracionin e ditëve të sotme, si për shembull eksodet e refugjatëve nga Vietnami, Kili, Bosnja, Siria, Afganistani dhe më së fundmi Ukraina.

Në muret e muzeut janë ngritur edhe ekrane të mëdha, ku vizitorët mund të dëgjojnë historitë e refugjatëve.

Muzeu, që ka kushtuar 16 milionë euro, është financuar nga donatorë privatë.

LEXONI GJITHASHTU:

• Ish-drejtori i muzeut në Paris nën hetim për trafik artefaktesh
• Familja hebre merr pronësinë e pikturës në muzeun spanjoll