Haradinaj: Diaspora e gjallëron jetën në Kosovë, qeveria t’i mundësojë lëvizje pa kufizime

Kryetari i Aleancës për Ardhmërinë e Kosovës, Ramush Haradinaj i ka bërë thirrje publike qeverisë së Kosovës, ku i kërkon të heqë ndalesat e qarkullimit deri pas festave për shkak të lëvizjes së lirë të bashkatdhetarëve.

Me një shënim në “Facebook”, z. Haradinaj ka thënë se ardhja e bashkatdhetarëve në atdhe gjallëron jetën dhe ekonominë e Kosovës.

 “Festat e fundvitit e gjallërojnë jetën në Kosovë, familjet tona dhe po ashtu ekonominë e vendit. Zakonshëm po ndodh edhe këtë vit, pavarësisht rrethanave pandemike, sikurse edhe në rrethanat e vështira historike për shqiptarët, mijëra bashkatdhetarë ia kanë mësyrë Kosovës”, ka shkruar Haradinaj.

Ai shprehet se bashkatdhetarët po hasin në vështirësi në kthimin e tyre në Kosovë.

“Apeloj tek institucionet e vendit, që të hiqet ndalesa e qarkullimit, të paktën deri pas festave. Kjo do mundësonte qarkullimin e lirë të motrave e vëllezërve tonë që jetojnë jashtë vendit, e që po hasin në vështirësi të arrijnë në shtëpitë e tyre. Mirë se vini bashkatdhetarë! Atdheu ju mirëpret!”, ka shkruar Haradinaj.