Haradinaj: Osmani presidente me vota kontrabandë, lufta për demokraci fillon sonte

Kreu i Aleancës për Ardhmërinë e Kosovës, Ramush Haradinaj e ka komentua zgjedhjen e Vjosa Osmanit si Presidente, proces të arritur përmes blerjes së votave në Kuvend.

Kryetari i AAK-së thotë se tashmë në Kosovës është instaluar një sistem një partiak dhe sqaron se pozicioni i partisë së tij do të jetë në opozitë.

“Sot pas zgjedhjes së znj. Osmani-Sadriu për Presidente të Kosovës, Aleanca qëndron faqebardhë në ruajtjen e sistemit kushtetues së demokracisë republikane. Votat e kontrabanduara në këtë proces tregojnë se Vetëvendosje dhe Guxo nuk guxojnë. Sistemi njëpartiak dhe i kapur sapo filloi. Aleanca do të jetë zë i ndërgjegjes së popullit, shtyllë kushtetuese dhe mbrojtëse e ekonomisë së tregut të lirë. Urime deputetëve që morën pjesë duke i përfshirë edhe ata të pazarit të natës që lan parimet për përfitime të atypëratyshme. Lufta për demokraci fillon sonte. Ftoj politikanët dhe qytetarët e vullnetit të mirë të mbrojmë së bashku vlerat e Kushtetutës dhe shtetit të lindur nga gjaku i lirisë”, shprehet Haradinaj.