Helmimi i agjentit të KGB-së, vjen në kinema filmi mbi vrasjen e Litvinenko

Një tregim drithërues i një prej vrasjeve më mizore të spiunazhit të kohëve moderne. David Tennant interpreton Aleksandr Litvinenko, ish-agjenti i KGB-së që u helmua me lëndën radioaktive “Polonium” në Londër, pasi doli kundër Valdimir Putin.

Ai u sëmur pasi takoi dy shtetas rusë në një hotel dhe para se të vdiste akuzoi Kremlinin se kishte urdhëruar vrasjen e tij.

“Të gjithë ishin të motivuar për të bërë gjënë e duhur. Ishte një nga ato detyra ku ndjen peshën  e përgjegjësisë pasi është histori e kohëve të fundit. Nuk po tregojmë diçka të ndodhur dekada më parë.

Kjo është histori aktuale, drithërimat e të cilës ndihen ende në pellgun ku po notojmë të gjithë. Ndaj mendoj se të gjithë donin ta trajtonin këtë subjekt me respekt, pasi është diçka që shkon përtej pritshmërive që mund të ketë dikush”, thotë David Tennant, aktor.

Një hetim i kryer nga autoritetet britanike zbuloi se Rusia ishte përgjegjëse për vdekjen e Litvinenkos, përfundim ky që u mbështet nga Gjykata Evropiane e të Drejtave të Njeriut.

Asokohe, vrasja tronditi mbarë botën. Ajo tregoi vullnetin e paprecedent të qarqeve të sigurisë së Kremlinit për të vepruar përtej kufijve të Rusisë, për të eliminuar personazhe të konsideruara armiq të shtetit.