Homazhe në Buenos Aires, Argjentina shpall tre ditë zi për humbjen e ish-kampionit të botës

Humbja e një prej lojtarëve më të mëdhenj të historisë së futbollit ka mbërthyer Argjentinën në zi kombëtare, me tifozët që nga e gjithë bota janë bashkuar në kujtim të të ashtuquajturit “El Pibe de Oro” (Djali i florinjtë).

Në Buenos Aires me mijëra tifozë dhe simpatizantë të Maradonës u dyndën rrugëve, për të nderuar atë që fitoi zemrat e të gjithëve me magjinë që dhuronte në fushën e lojës.

Me mesazhe dhe pankarta në duar, mbështetësit e fituesit të Kupës së Botës për orë të tëra bënë homazhe dhe kujtuan momente nga karriera e Diegos. 

“Ky lajm më theu zemrën. Vetëm Maradona mund të ma thyente zemrën. menjëhëherë sapo ne morën vesh lajmin vendosëm që vinim këtu, në nderim të tij. Edhe në ditët e ardhshme do të jemi këtu. Kudo që do i jepet lamtumira e fundit, ne do të jemi atje dhe kjo është e padiskutueshme,” – tha tifozi Jorge Daniel Bringas.

Menjëherë sapo u publikua lajmi, një pjesë e tifozëve vendosën që të shkonin në shtëpinë e Maradonës, të mërzitur dhe të pikëlluar.

“Shumë e dhimbshme. Nuk kam fjalë. Nuk e kisha imagjinuar kurrë që Diego nuk do të ishte më mes nesh. Mendoja se pas operacionit do të bëhej mirë, është e paimagjinueshme,” – tha Patricia, një tifoze e futbollit.

Mes homazheve dhe brohoritjeve, tifozët kanë premtuar që për ditë me radhë do të nderojnë idhullin e tyre.

Argjentina shpalli tre ditë zi pas ndarjes nga jeta e Maradonës, ai që kosniderohet si personi që la një trashëgimi për gjithë vendin.