Hoti i kërkon drejtorit të Agjencisë Kosovare të Inteligjencës që të japë dorëheqjen

Kryeministri i Kosovës, Avdullah Hoti i ka kërkuar drejtorit të Agjencisë Kosovare të Inteligjencës, që të japë dorëheqjen.

Në njoftimin e lëshuar nga zyra e shtypit të kryeministrit Kosovar, nuk jepet asnjë motiv mbi arsyet që kanë çuar Hotin për t’i kërkuar Kreshnik Gashit të lirojë zyrën.

Sipas ligjit aktual në Kosovë, emërimi i drejtorit të Inteligjencës bëhet nga kryeministri së bashku me presidentin.

“Presidenti i Republikës së Kosovës së bashku me kryeministrin, emërojnë së bashku drejtorin e AKI brenda njëzet ditësh pune nga dita kur vendi mbetet i lire”, thuhet në pikën 3 të nenit 5 të ligjit për AKI-në. 

Kreshnik Gashi është emëruar drejtor i Agjencisë Kosovare të Inteligjencës që prej 25 nëntor 2019, dakordësuar nga ish-kryeministri Ramush Haradinaj dhe ish-presidenti Hashim Thaçi.