Hoti pret ambasadorët e QUINT-it, por nuk flet për arrestimet e përfaqësuesve të OVL-UÇK-së

Kryeministri i Kosovës, Avdullah Hoti, së bashku me koordinatorin për dialogun Skënder Hyseni kanë zhvilluar një takim me ambasadorët e shteteve të QUINT-it, si dhe shefin e zyrës së BE-së në Kosovë, Tomas Szunyog.

Lajmi konfirmohet nga vetë shefi i qeverisë me një shënim në rrjetin e tij social “Facebook”. Ai thotë se në takim temë e diskutimit kanë qenë zhvillimet ekonomike, politike, por dhe situata e pandemisë së Covid-19.

“Bashkë me Koordinatorin Shtetëror për Dialog, Skënder Hyseni, prita sot në takim ambasadorët e shteteve të QUINT-it dhe Shefin e Zyrës së BE-së në Kosovë, Tomas Szunyog, me të cilët biseduam rreth aktualitetit politik dhe ekonomik në vend, si dhe për luftën kundër COVID-19”, shkruan Hoti.

Gjithashtu, z. Hoti thekson se ka folur edhe për procesin e dialogut me Serbinë, ndërsa rithekson se Kosova mbetet e angazhuar për ta çuar përpara këtë proces.

 “Qeveria e Kosovës mbetet e angazhuar në procesin e dialogut me Serbinë, dhe theksova se ky proces duhet të përmbyllet me marrëveshjen gjithëpërfshirëse dhe ligjërisht obliguese, që përfundon me njohjen reciproke ndërmjet dy vendeve. Po ashtu, i njoftova edhe për nënshkrimin e marrëveshjes për normalizimin e marrëdhënieve ekonomike, ndërmjet Republikës së Kosovës dhe asaj të Serbisë, e cila ndodhi më 4 shtator në Shtëpinë e Bardhë.Ambasadorët i njoftova edhe për masat që po ndërmarrim në luftën kundër pandemisë COVID-19, dhe vlerësova maksimalisht rolin e shteteve të QUINT-it dhe të BE-së, për mbështetjen e vazhdueshme që i japin Kosovës”, thekson Hoti.

Por, pavarësisht kësaj, kryeministri Hoti nuk ka zgjedhur të komentojë zhvillimet e fundit, ku gjatë ditës së sotme u arrestuan dy emrat kryesorë të Organizatës së Veteranëve të Luftës së UÇK-së, Hysni Gucati dhe Nasim Haradinaj.

Lexoni gjithashtu: 

Policia e Kosovës ndalon nënkryetarin e OVL-UÇK-së Nasim Haradinaj

Nasim Haradinaj: Do publikojmë në media CD-të që janë paralajmëruar të vijnë pranë zyrave të OVL-UÇK

​Tensionohet situata në Kosovë, qytetarët bllokojnë rrugën dhe gjuajnë me shishe pjesëtarët e EULEX

EULEX arreston kreun e veteranëve të UÇK

Hysni Gucati: Do të bindim opinionin publik se Gjykata Speciale bashkëpunon me Serbinë

Gjykata Speciale konfirmon arrestimin e ish-zyrtarit të FSK, Salih Mustafa