Të paktën tre persona kanë humbur jetën në një aksident autobusi në Norvegji. Aksidenti ndodhi rreth orës 13:30 në distriktin Hadsel në bregun veriperëndimor të vendit.

Autobusi doli nga rruga dhe përfundoi pjesërisht në liqenin Asvatnet, thanë autoritetet në një deklaratë për shtyp. Mendohet se në momentin e përplasjes ndodheshin 58 persona, shumë prej të cilëve, sipas policisë, janë shtetas të huaj.

Përveç viktimave, policia tha se katër persona ishin plagosur rëndë.

Tre persona janë dërguar në spitalin Stokmarknes me helikopter shpëtimi, ndërsa pasagjerët e tjerë janë dërguar në një shkollë aty pranë.

Kryqi i Kuq Norvegjez tha në mediat sociale se po dërgonte ekipe për të ndihmuar në një “aksident të rëndë autobusi” në rrugën E10.

Në vendngjarje kanë punuar edhe ekipet e zjarrfikëses, ambulanca dhe policia. Në këtë zonë ka pasur raporte për reshje të dendura dëbore dhe erëra të forta, të cilat i kanë vështirësuar përpjekjet e shpëtimit.

Transmetuesi publik NRK raportoi se autobusi po udhëtonte nga qyteti i Narvik për në arkipelagun Lofoten.

Kryeministri Jonas Gahr Støre tha se përplasja ishte “një situatë shumë serioze” dhe se mendja e tij ishte me të gjithë të prekurit.

LEXONI GJITHASHTU:

• Aksident me vdekje në Mat, makina përplas për vdekje të moshuarin
• Viti i Ri me tryezën bosh, 80-vjeçari: Po shoh çfarë më përballon xhepi, jetoj vetëm