Humbi jetën prej COVID-19, Presidenti Meta dekoron pas vdekjes gjeneralin Ndriçim Sallaku

Presidenti Ilir Meta nderoi me dekoratën “Nderi i Kombit” gjeneralin Ndriçim Sallaku, i cili u nda nga jeta si pasojë e COVID-19.

Përmes një postimi në Facebook, Meta tha se e vlerësonte Sallakun për “kontributin në modernizimin e ushtrisë shqiptare” dhe “shembullin si ushtarak karriere”.

“Në vlerësim të veprës së çmuar e të gjithanshme si një ushtarak model dhe i shkëlqyer karriere, për modernizimin e Forcave të Armatosura shqiptare dhe me mirënjohje shtetërore për vlerat atdhetare e njerëzore, që shpalosi gjatë veprimtarisë së tij,” – arsyetoi Meta dekoratën.

Sallaku u nda nga jeta të shtunën, për të shprehën ngushëllim edhe ministri i mbrojtjes Niko Peleshi si dhe ambasadorja e Shteteve të Bashkuara në Tiranë, Yuri Kim.