Hungaria dhe Sllovakia ndalojnë eksportet e naftës në Ukrainë

Hungaria dhe Sllovakia njoftuan të mërkurën se do të pezullojnë eksportet e naftës në Ukrainë për shkak të tensioneve në rritje mbi furnizimet me naftë, duke thënë se duhet të sigurojnë furnizimet e tyre me energji për të zëvendësuar importet e naftës ruse përmes tubacionit të dëmtuar Druzhba, me Hungarinë që akuzon gjithashtu Ukrainën për shantazh dhe ndërhyrje politike.

Kjo mosmarrëveshje është një tjetër shembull i konflikteve midis dy qeverive të BE-së, të cilat ende importojnë sasi të mëdha të naftës bruto ruse nëpërmjet Ukrainës, dhe Kievit, i cili u ka bërë thirrje vazhdimisht atyre që të shkëputen plotësisht nga energjia ruse.

Transferimet e naftës nga Rusia në Hungari dhe Sllovaki u ndalën më 27 janar. Sipas raporteve të medias, tubacioni që i transportonte ato u dëmtua nga një sulm ajror rus në territorin ukrainas.

“Furnizimet me naftë në Ukrainë janë ndërprerë. Dhe furnizimet me naftë në Ukrainë nuk do të rifillojnë derisa ukrainasit të rifillojnë furnizimet me naftë bruto nëpërmjet tubacionit Druzshba në Hungari”, tha Ministri i Jashtëm hungarez Peter Szijjarto.

Si Hungaria ashtu edhe Sllovakia thonë se kanë rezerva të mjaftueshme karburanti, por duan ta ridrejtojnë naftën në tregjet e tyre të brendshme.

Ministri i Jashtëm Szijjarto tha se Ukraina kishte mjete dhe kohë të mjaftueshme për të riparuar tubacionin dhe se mosveprimi në këtë drejtim ishte një vendim politik.

“Fakti që Ukraina nuk do të rifillojë transportin e naftës drejt Hungarisë është një vendim politik, një vendim politik i marrë nga vetë presidenti ukrainas”, shtoi ai.

Në Sllovaki, qeveria e kryeministrit Robert Fico njoftoi një përgjigje të ngjashme. Rafineria shtetërore Slovnaft do të pezullojë eksportet e naftës në mënyrë që t’i japë përparësi furnizimit vendas, dhe Sllovakia ka lëshuar gjithashtu 250,000 ton naftë nga rezervat e saj të emergjencës.

“Slovnaft po ndalon eksportin e naftës në Ukrainë dhe çdo eksport tjetër, dhe gjithçka që do të përpunojë tani në Sllovaki do të jetë e destinuar për tregun sllovak”, tha Fico.

Hungaria dhe Sllovakia i bënë gjithashtu thirrje Komisionit Evropian që të mundësojë transportin e naftës bruto ruse përmes porteve kroate drejt Hungarisë dhe Kroacisë. Kroacia më parë e hodhi poshtë këtë kërkesë, duke thënë se transferimi i naftës ruse mund të shkelë sanksionet amerikane.