I dënuar për trafik droge, Prokuroria e Vlorës i sekuestron pasuri me vlerë 400 mije euro

Prokuroria e Vlorës këtë të mërkurë ka sekuestruar apartamentet dhe automjetet e shtetasit A.Rr. dhe familjarëve të tij me vlerë rreth 400.000 euro.

Sipas hetimeve, A.Rr ishte i dënuar më parë ‘Trafik të lëndëve narkotike’ dhe ‘Organizatë krimiale’ dhe nuk i justifikon pasuritë e krijuara.

Njoftimi i plotë i Prokurorisë:

VLORË

Nuk justifikohen nga të ardhura të ligjshme, Prokuroria e Vlorës sekuestron pasuritë e shtetasit A.Rr. i dënuar më parë për ‘trafik narkotikësh’ e ‘organizatë kriminale’

Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Vlorë, u sekuestruan pasuritë e shtetasit A.Rr. dhe familjarëve të tij, nën hetim për veprën penale ‘Pastrimi i produkteve të veprës penale ose veprimtarisë kriminale’, parashikuar nga neni 287 i Kodit Penal.

Në kuadër të hetimeve mbi procedimin penal nr.1125 të vitit 2020, rezultoi se shtetasi A.Rr., i dënuar më parë për ‘Trafik të lëndëve narkotike’ dhe ‘Organizatë krimiale’, nuk justifikonte pasuritë e krijuara, për të cilat Prokuroria pranë Gjykatës së Shkallës së Parë të Juridiksionit të Përgjithshëm, Vlorë kërkoi sekuestrimin si më poshtë:

1. Pasuria e llojit “apartament” me nr.pasurie 29/519+2-2, me sip.67 m², Vlorë, në zotërim të shtetasit B.B dhe A.Rr;
2. Pasuria e llojit “apartament” me nr.29/599+1-22, me sip.73 m², Vlorë, në zotërim të shtetasve A.Rr dhe B.B;
3. Pasuria e llojit “apartament” me nr.113/34+2-20, me sip.68.8 m², ZK 3292, Tiranë, në zotërim të shtetases B.B;
4. Pasuria e llojit ‘njësi’ me nr. 12/417-N4 ZK 8602, Vlorë, me sip. 27 m2, në zotërim të shtetasit A.Rr; 
5. Pasuria e luajtshme automjet marka “Toyota Corolla” viti 2020, në zotërim të shtetases B.B;
6. Pasuria e luajtshme automjet marka “Volvo XC 60” viti 2020, në zotërim të shtetases B.B; si dhe
7. Pasuria e luajtshme automjet marka “Mercedes benz GLA” viti 2016, në zotërim të shtetases S.Rr.

Gjykata e Shkallës së Parë të Juridiksionit të Përgjithshëm Vlorë pranoi kërkesën e organit të akuzës, duke caktuar masën e sigurimit pasuror sekuestro preventive për pasuritë e mësipërme të paluajtshme në vlerë totale 400.000 euro.