I mituri u plagos nga hedhja e inerteve, procedohen drejtuesi teknik dhe punonjësi i firmës në Kukës

Një nxënës 11-vjeç është plagosur pranë një objekti pranë shkollës së mesme në qytetin e Kukësit. mësohet se i mituri është plagosur nga inertet e objektit i cili është rikonstruksion. Lidhur me ngjarjen ka nisur procedimi i një 26-vjeçari i cili është punonjës i firmës.

Ai akuzohet për veprën penale “Plagosja e lehtë nga pakujdesia” pasi i riu ka hedhur inertet gjatë kohës kur i mituri ka qenë pranë objektit.

I mituri fatmirësisht është jashtë rrezikut për jetën ndërsa po merr ndihmë mjekësore në spitalin e Traumës. Gjithashtu lidhur me plagosjen e 11-vjeçarit është proceduar drejtuesi teknik i firmës për veprën penale “Shkelja e rregullave të mbrojtjes në punë”.

“DVP Kukës/ Specialistët për Hetimin e Krimeve të Komisariatit të Policisë Kukës referuan materialet në Prokurori ku nisi procedimi për shtetasit:

-K. K., 26 vjeç, banues në Kukës, për veprën penale “Plagosja e lehtë nga pakujdesia”, punonjës i firmës që po kryen punimet për rikonstruksionin e një objekti pranë shkollës së mesme në qytetin e Kukësit, pasi dje, gjatë kohës që ka hedhur inerte, është dëmtuar një nxënës 11-vjeç, i cili kishte kaluar perimetrin e sigurisë. Ai po merr mjekim në Spitalin e Traumës dhe nuk ka probleme për jetën.

-A. D., 62 vjeç, drejtuesi teknik i firmës që po kryen punimet për rikonstruksionin e objektit, për veprën penale “Shkelja e rregullave të mbrojtjes në punë”. Materialet procedurale iu referuan Prokurorisë, për veprime të mëtejshme”, njofton policia.