Ilir Beqaj jashtë parlamentit: U kërkoj ndjesë socialistëve shkodranë, objektivi për 4 mandate nuk u arrit

Ilir Beqja nuk mundi të merrte mandatin në zgjedhjet e së dielës, ndaj nuk do të jetë deputet i PS në Parlamentin e ri.

Z. Beqaj nuk ka mundur të kalojë herësin dhe deputetët e PS që kanë marrë mandatin në këtë qark janë sipas listës së kryesisë: Edona Bilali, Paulin Sterkaj dhe Benet Beci.

Përmes një statusi në faqen e vet në Facebook z. Beqaj shpreh falenderimet për të gjithë socialistët e Shkodrës, ndërsa kërkon ndjesë për mosarritjen e objektivit për të marrë 4 mandate.

“Objektivi bazë në këto zgjedhje për Partinë Socialiste ishte 4 mandate deputetësh. Ky objektiv nuk u përmbush. Dhe unë, padyshim, kam detyrimin t’i kërkoj ndjesë sot socialistëve shkodranë.

Jam përpjekur të bëj maksimumin tim, por ja që nuk ka mjaftuar.

Sipas zgjedhjes suaj, unë nuk do të jem në Kuvendin e ardhshëm si përfaqësues i juaji. E dëshiroja shumë të kisha privilegjin të kontribuoja edhe unë për Shkodrën.

Gjithsesi, Shkodra është e para”, shkruan Beqaj në Facebook.

Njëmbëdhjetë mandatet e qarku Shkodër u ndanë 5 për PD, 3 për PS, 2 për PSD dhe 1 për LSI.