Iran, gjyqësori vazhdon ndëshkimin e manifestuesve kundër regjimit

Me rrugët e Teheranit të mbushura me zemërim kundër politikave të regjimit, gjyqësori iranian vazhdon të japë dënime me vdekje ndaj personave të arrestuar gjatë demonstratave antiqeveritare që kanë tronditur vendin që prej shtatorit.

Tre persona u dënuan me varje ditën e mërkurë, duke e çuar në 5 totalin e personave të dënuar me vdekje që prej së dielës. Një nga të pandehurit u akuzua për vrasjen e një agjenti policie, një tjetër për sulmin me thikë ndaj një roje sigurie dhe i treti për dëmtim të pronës publike dhe ushtrim të terrorit.

Protestat antiqeveritare në Republikën Islamike nisën në fund të shtatorit pasi u bë publike vdekja e një vajze 22-vjeçare që ishte në duart e policisë, pasi ishte arrestuar për shkelje të ligjit islamik.

Demonstratat u përhapën në të gjithë vendin pavarësisht shtypjes brutale, që sipas të dhënave të shoqatave humanitare, kanë lënë të paktën 326 të vdekur dhe mbi 2 mijë të arrestuar. Shumë prej këtyre të fundit rrezikojnë dënimin kapital.

Vetë Republika Islamike pretendon se protestat janë organizuar nga agjentë të shërbimeve sekrete perëndimore, të cilave u intereson ndryshimi i regjimit.

LEXONI GJITHASHTU:

• SPAK lëshon 11 urdhër-arreste për inceneratorët | 5 zhvillimet kryesore
• Dënimi i poetes Ahmeti për ndërtim pa leje, Rama sulmon sërish Prokurorinë e Tiranës