Irani drejt ligjit për menaxhimin e Ngushticës së Hormuzit, Parlamenti pritet të votojë

Parlamenti i Iranit pritet të votojë një projektligj që do të formalizojë me ligj menaxhimin e Ngushticës së Hormuzit, një prej rrugëve detare më strategjike në botë për transportin e energjisë.

Lajmi u bë i ditur nga Alaeddin Salimi, anëtar i bordit drejtues të parlamentit iranian, i cili tha se ligjvënësit kanë marrë një “vendim përfundimtar” për të kodifikuar kontrollin dhe menaxhimin e kësaj rruge ujore.

Sipas Salimit, parlamenti iranian nuk do të lejojë që fuqitë e huaja të ndikojnë apo të diktojnë politikat që lidhen me Ngushticën e Hormuzit, duke theksuar se vendimet për të do të merren vetëm nga autoritetet iraniane.

Ai bëri të ditur se projektligji do t’i nënshtrohet shqyrtimit të plotë parlamentar dhe më pas do të paraqitet në seancë plenare për debat dhe votim.

Ngushtica e Hormuzit, e vendosur mes Iranit dhe Omanit, konsiderohet një nga arteriet më të rëndësishme të tregtisë globale të energjisë, pasi përmes saj kalon një pjesë e madhe e eksporteve botërore të naftës dhe gazit natyror. Për këtë arsye, çdo zhvillim që lidhet me statusin ose menaxhimin e saj ndiqet me vëmendje nga tregjet ndërkombëtare dhe fuqitë globale.