Irani paralajmëron SHBA-në dhe Izraelin: Do të godasim universitetet në Lindjen e Mesme

Mbrëmjen e djeshme, Ministria e Jashtme e Iranit dënoi sulmet ajrore ndaj dy prej universiteteve kryesore të vendit.

Sot, Garda Revolucionare ka paralajmëruar se nuk do të durojë sulme ndaj institucioneve të vendit dhe do t’i konsiderojë universitetet izraelite dhe degët e universiteteve amerikane në rajon si “objektiva legjitime”.

“Nëse SHBA-të duan gjithashtu të parandalojnë sulme të mëtejshme ndaj universiteteve të tyre në rajon, duhet t’i frenojnë forcat aleate nga sulmet ndaj universiteteve dhe qendrave kërkimore”, thuhet në deklaratë.

Ata gjithashtu kërkojnë që SHBA-të ta ndalojnë Izraelin nga sulmet ndaj universiteteve dhe qendrave kërkimore iraniane, të cilat janë sulmuar ditët e fundit.

Grupi paralajmëroi studentët, stafin dhe banorët e afërt të qëndronin të paktën një kilometër larg kampuseve të universiteteve amerikane në rajon.

Universitetet amerikane që kanë kampuse në Gjirin Persik përfshijnë universitetet Texas A&M dhe Northwestern në Katar, si dhe Universitetin e Nju Jorkut në Emiratet e Bashkuara Arabe.

Kjo është hera e parë që Irani ka kërcënuar të sulmojë universitetet izraelite dhe amerikane.