Irani paralajmëron shtetasit e vet të largohen nga Ukraina

Ministria e Jashtme e Iranit ka këshilluar qytetarët e saj që të përmbahen nga udhëtimet në Ukrainë “për shkak të përshkallëzimit të konfliktit ushtarak dhe rritjes së pasigurisë në Ukrainë”.

Ministria ka thënë përmes një deklarate më 21 tetor se iranianët në Ukrainë këshillohen të largohen nga ky shtet “për sigurinë e jetës së tyre”.

Prej nisjes së luftës së Rusisë në Ukrainë, në fund të muajit shkurt, të dyja palët kanë luftuar në disa rajone të shtetit, sidomos në lindje dhe jug.

Në javët e fundit, Rusia ka nisur një mori sulmesh me raketa dhe dronë kamikazë në qytete të ndryshme të Ukrainës, përfshirë kryeqytetin, Kievin.

Shtetet e Bashkuara kanë thënë më 20 tetor se Irani i ka ndihmuar Rusisë rreth operimit me dronë.

Shtëpia e Bardhë ka thënë se iranianët janë në Krime, duke iu ndihmuar rusëve që të shënjestrojnë Ukrainën me dronët iranianë.

Në deklaratën e ministrisë iraniane nuk është përmendur kjo çështje.

LEXONI GJITHASHTU:

• SHBA-ja ka prova të pranisë së forcave iraniane në Krime
• BE-ja vendos sanksione të reja ndaj Iranit për furnizimet me dron në Rusi