Ish-ambasadori i Shqipërisë në Paris, Ylljet Aliçka: Mediat franceze mbuluan ethshëm raportin e Dick Marty

Duke komentuar së bashku me anëtarin e kryesisë së PD-së Tomor Alizotin gjyqin ndaj ish-udhëheqjes së Ushtrisë Çlirimtare të Kosovës, ish-ambasador i Shqipërisë në Francë Ylljet Aliçka, kujtoi se në vitet kur u publikua raporti i Dick Marty-it, mediat franceze nuk i dhanë hapësirë për të hedhur poshtë pretendimet e tij.

“Nuk ishte e lehtë për të çarë në mediat franceze, dukej se raporti ishte i programuar me kohë, jo vetëm raporti, por edhe deputeti Dick Marty njihet si anti-shqiptar… propozimi nga delegacioni rus pranë Asamblesë Parlamentare të Këshillit të Evropës… u ngrit menjëherë një komision ad-hoc [hetimi] dhe iu besua një reporteri si Dick Marty, që ka qenë vërtetë gjithmonë kundër çështjes së Kosovës dhe u lançua në Paris me një mbulim mediatik të ethshëm,” – kujtoi për Euronews Albania, ish-ambasadori shqiptar në Paris, Aliçka, i cili njihet gjithashtu si shkrimtar.

Aliçka u shpreh se diplomacia shqiptare u zu në befasi nga raporti i Dick Marty-it, ndërkohë që me kalimin e viteve tashmë po bëhet e mundur që prej lobimit serb Evropa të mbajë më shumë mend “krimet e shqiptarëve se sa ato të serbëve”.

I pyetur se çfarë do të duhej të kishte bërë më mirë shteti shqiptar asokohe për ta adresuar më mirë çështjen e ngritur nga raporti i Dick Marty-it, Aliçka tha se ka plane juridike, morale dhe propagandistike.

“Në tallazinë e përpunimit të opinionit publik institucioni i manipulimit nga ana e Serbisë është goxha i mirëmenduar, programuar dhe institucionalizuar. Gjithë synimi është mohimi i Kosovës, deligjitimi i luftës çlirimtare, gati-gati për të bërë një simetri… krimi po merr ngjyrën e virtytit, po shtohet pluhuri i harresës, me procedurat e zgjatura… janë bërë 11 vite që është ngritur komisioni në Asamblenë e KiE-së dhe vazhdon deligjimimi,” – tha shkrimtari Aliçka.

Ish-ambasadori shqiptar kujtoi faktin se raporti dhe hetimet nisën pas botimit të librit të ish-kryeprokurores së Gjykatës së Hagës, Carla del Ponte. Aliçka tha se del Ponte kishte asistente gazetaren Isabel Hardman, e cila i kundërshtoi dhe hodhi poshtë pretendimet e saj.

“Një gazetare të tillë, e cila nxori falsifikimet e Carla del Pontes duhej ta kishin bërë heroinë, diplomacia duhet të shihte se çfarë të bënte… atë intervistë timen të asaj kohe, ishte shumë e vështirë [ta bëja], madje qesh ftuar si shkrimtar jo për çështjen, u përpoqa të bëja një reagim kundër raportit në Le Monde, më thanë ishte kundër linjës editoriale, Figaroja po ashtu…” – u shpreh Aliçka duke theksuar se lobimi për të nxitur dhe përpunuar propagandën ishte shumë i lartë asokohe pavarësisht se e vërteta ishte me Kosovën.

Për sa i përket zhvillimeve të fundit të politikës së brendshme me plot përplasje në Shqipëri dhe Kosovë, Aliçka theksoi se “është luks i madh të ndodhë kjo në kohën kur po të ndodh një poshtërim identiteti”.

Ndiqni intervistën e plotë: