Ish-futbollisti Robinho dënohet me 9 vite burg për përdhunimin e një vajze shqiptare

Ish-futbollisti brazilian Robinho është dënuar me nëntë vite burg për përdhunimin në grup ndaj një vajze shqiptare.

Gjykata e Apelit në Milano la në fuqi të enjten vendimin e shkallës së parë, që dënoi me burg gjashtë persona, përfshirë ish-futbollistin e Milanit, Robinho dhe mikun e tij të ngushtë Ricardo Falco.

Çështja ka lidhje me ngjarjen e ndodhur më 22 janar 2013, në një klub nate të Milanos në Itali, kohë kur futbollisti aktivizohej në sezonin e tij të tretë me Milanin në Serie-A.

Prokuroria pati kërkuar dhjetë vite burg. Robinho, emri i vërtetë i të cilit është Robson de Souza Santos, është detyruar që së bashku me Falcon t’i paguajë vajzës 60 mijë euro dëmshpërblim.

Mbetet në diskutim se si do ta shlyejë dënimin 39-vjeçari, i cili gjatë karrierës së tij është aktivizuar gjithashtu me Realin e Madridit dhe Manchester City-in dhe së fundmi, deri në muajin tetor, qe aktivizuar me Santosin në Brazil.