Ish-komandanti i UÇK: Ngritja e Gjykatës Speciale nga Kosova gabim i madh, kriminelët janë në Beograd

Ahmet Isufi, Ish-komandant i UÇK-së dhe nënkryetar i AAK tha për Euronews Albania se votimi i Gjykatës Speciale nga kuvendi i Kosovës ishte një gabim shumë i madh.

Sipas tij, ajo është një gjykatë që s’ka pasur nevojë të krijohet, sepse lufta e UÇK ka qenë e drejtë, e pastër dhe me motive çlirimtare, ndaj nuk duhej trajtuar siç po bëhet, pasi krimet e vërteta dhe luftën me gjenocid e ka bërë Serbia.

“Ndaj kemi 13 mijë viktima, 20 mijë gra të dhunuara, djegie dhe shfarosje të pronave, që kanë ndodhur në Kosovë. Kriminelët e vërtetë janë në Serbi. Ata kanë sponsorizuar një dosje përmes Dick  Martin dhe që fatkeqësisht kjo është marrë parasysh nga Këshilli i Evropës.

Pretendimet e para të Martin që lidhen me ‘shtëpinë e verdhë’ kanë rënë, por tani ka kaluar në terren tjetër. Kjo gjykatë është bërë me presion në Kuvendin e Kosovës dhe deputetët kanë bërë gabim që e kanë votuar, edhe pse nën presion nga bashkësia ndërkombëtare.

Serbia ka investuar shumë në këtë drejtim që tani në vend që të gjykohen kriminelët e vërtetë, gjykohen viktimat”, tha ish-komandanti i UÇK.

Z. Isufi tha se dëshmitarët me të cilët prokuroria pretendon të vërtetojë akuzat janë të rremë.

“Dëshmitarët që janë thirrur kanë pasur interes azilin dhe qëllime politike që të cenohet lufta e UÇK. Prokuroria ka ftuar dëshmitarë të rrejshëm që janë ofruar për interesa të ndryshme.

Nuk janë ftuar qytetarë të thjeshtë që do të dëshmonin për të vërtetën. Historia nuk rishkruhet askund. Ne jemi dëshmitarë të gjallë të asaj që ka ndodhur në Kosovë”, tha ai.