Ish-kryeprokurori Adriatik Llalla vështirë të marrë azil politik, thotë juristi

Juristi Arbër Hoxha është i mendimit se ish-Prokurori i Përgjithshëm Adriatik Llalla ka pak shanse të marrë azil politik në një vend të Bashkimit Evropian.

Gjatë një interviste për Euronews Albania, juristi Hoxha tha se vendet e BE-së e konsiderojnë Shqipërinë një vend të sigurt.

“Shqipëria konsiderohet një vend i sigurt dhe shanset për të marrë azil politik janë thuajse zero, kështu që Llalla nuk besoj se do të provojë shanset e tij për të marrë azil politik, le ta shohim si do të ecë në dinamikë, por shanset që një ish-funksionar i lartë sidomos në të tilla rangje të marrë azil politik në një vend të BE-së, besoj se janë shumë të pakta,” – tha Hoxha.

Juristi tha se mundësitë e pakta për azil politik lidhen pikërisht me vendimin e formës së prerë që ka tashmë Llalla kundër tij.

Gjykata e Apelit la dje në fuqi dënimin me dy vite burg dhe ndalim ushtrimi funksionesh publike për 5 vite ndaj Ish-Prokurorit të Përgjithshëm Adriatik Llalla. Ky nuk ishte i pranishëm në seancën gjyqësore, njësoj si në dy seancat e fundit.

Avokati i Llallës tha për mediat se ai është i sëmurë dhe është shtruar në spital. Sidoqoftë ai nuk saktësoi se në cilin spital ndodhej, ndërkohë që policia nuk e gjeti Llallën në shtëpi.

Ish-kryeprokurori dyshohet se ndodhet jashtë shtetit. Atij i është ndaluar udhëtimi në SHBA, pasi është listuar në personat “non grata”.

LEXONI GJITHASHTU:

• Rënia e një kryeprokurori: Kush është Adriatik Llalla, nga akuzues në i akuzuar
• 2 vite burg ish-kryeprokurorit Llalla, mbetet në fuqi vendimi
• Dënimi i ish-kryeprokurorit Adriatik Llalla, reagon ambasada britanike në Tiranë