Ish-presidenti i Vllaznisë Valter Fushaj shpreh interesin për të blerë aksionet e klubit

Ish-presidenti i Vllaznisë, Valter Fushaj, ka shprehur të hënën publikisht interesimin e tij për të rimarrë drejtimin e klubit.

Në një konferencë për shtyp, Fushaj tha se do të përfshihet në ankandin e njoftuar ditë më parë nga Bashkia e Shkodrës për blerjen e aksioneve të klubit. Por ai tha se paraprakisht duhet që të hyjë në fuqi vendimi për faljen e kamatave të akumuluara ndër vite ndaj mos-shlyerjes së taksave.

Fushaj e komentoi me prapavijë poltiike përshpejtimin e procedurave për shitjen e aksioneve të klubit nga ana e Këshillit Bashkiak të Shkodrës. Sipas tij “politika duhet të qëndrojë larg futbollit” dhe procedura e shitjes së aksioneve mund të ishte kryer përgjatë 10 viteve.

“Jam i gatshëm të bashkëpunoj edhe me kontributorë të tjerë ndër vite pasi do të rriste të ardhurat e Vllaznisë dhe do të ishte një hap drejt rikthimit të Vllaznisë në lavdinë e dikurshme,” – u shpreh Fushaj, duke nënkuptuar se mund ta ndajë drejtimin e mundshëm të klubit edhe me sipërmarrës të tjerë që do të përfshihen në ankandin e aksioneve.

Javën e shkuar, me 39 vota “pro” Këshilli i Bashkisë Shkodër i hapi rrugë shitjes së 100% të aksioneve të klubit me një çmim tavan prej 400 mijë eurosh (50 milionë lekë).

Më parë bashkia nxiti përmes një ankete qytetarët e Shkodrës që të shprehnin opinionin e tyre rreth kësaj çështjeje.

Klubi i Vllaznisë u themelua rreth 100 vite më parë dhe është ndër klubet më të ndjekura të futbollit shqiptar me 17 trofe të fituar – nëntë kampionate, gjashtë kupa të Shqipërisë dhe dy Superkupa.

Vllaznia kaloi një periudhë të vështirë me vonesa në paga në fillim të këtij viti. Situata detyroi largimin e trajnerit Mirsad Jonuz.

Shkak për vështirësinë qe bërë mungesa e përpilimit dhe miratimit në kohë të bilanceve të dy viteve të fundit dhe mos-miratimi i buxhetit nga bashkia pas situatës së amullt që sollën zgjedhjet vendore të 30 qershorit 2019.

Sipas Open Data Albania, në dhjetë vitet e fundit xhiroja maksimale e bërë nga klubi ka qenë 387 mijë euro (48 milionë lekë, viti 2012), por që të paktën në katër vitet e mëvona klubi vuajti humbje të thella duke e mbyllur vitin 2016 me -646 mijë euro.

Lexoni gjithashtu:

Bashkia e Shkodrës i hap dritën jeshile privatizimit të KF Vllaznia

Vllaznia mbetet pa trajner, Mirsad Jonuz largohet pas vonesave me pagat

Problemi i pagave te Vllaznia, Kadia: Marrëveshja nuk ka përfshirë Këshillin Bashkiak, buxheti ende i parishikuar