Ish-studenti i Dhjetorit: Protesta ishte spontane për Shqipëri të lirë dhe demokratike

Gazmend Shpata ish-student i dhjetorit, e kujton 8 dhjetorin e 1990, si “një protestë spontane, e paorganizuar, në fillim e ngritur për kushte të jetesës, e më pas më gjerë”. I ftuar në emisionin “Me pak fjalë”, në Euronews Albania ai tregoi se studentët kërkuan të takoheshim me drejtuesit më të lartë të shtetit atëherë.

“Atëherë vetëdija u rrit, u bashkuan edhe intelektualë, dhe u rrit vetëdija. Unë mund të them që kishte trima mes studentëve, që u ngritën dhe dikush i pasoi siç ishte shoku i dhomës, e kështu u bë një ortek. E më pas u bashkuan edhe student të tjerë.

Një vit më parë ne ishim pjesë e paradës së Partisë së Punës, dhe e rëndë do të ishte nëse dikush do të bojkotonte atë paradë. Por kishte djem e vajza të guximshëm që bënë atë që ndodhi.

Ne e bëmë sepse e ndjemë, ne shprehëm dëshirat për Shqipëri të lirë dhe demokratike. Nuk e bëmë sepse kërkonim ndonjë avantazh”, tregon ai.

Ish-studenti i Dhjetori rrëfen më tej se mungesa e perspektivës e çoi drejt emigrimit në 1996, sepse siç thotë humbi shpresën që ai vend, në atë kohë, kishte forcën për të ecur përpara.

“Klasa intelektuale ka ekzistuar atëherë në Shqipëri, por klasat e tjera janë shumë herë më të fuqishme dhe e ndryshmin intelektualët e asaj kohe”, përfundon z. Shpata.