Ishte nisur nga Izraeli në SHBA/Kapet 500 kg lëndë narkotike në aeroportin e Athinës

Inspektorët e Autoritetit të Pavarur të të Ardhurave Publike kanë zbuluar dhe sekuestruar një sasi prej gjysmë toni substancës narkotike KHAT në Aeroportin “Eleftherios Venizelos” në Athinë, njoftohet nga autoritetet sot.

KHAT, një substancë psikotrope e njohur edhe si koka natyrale, shkakton varësi dhe nxirret nga bima Catha Edulis, që kultivohet kryesisht në Bririn e Afrikës, Gadishullin Jugor Arabik dhe bregdetin e Afrikës Lindore.

Substanca ilegale ishte fshehur në katër dërgesa me mallra që ishin deklaruar si perde, çarçafë dhe pëlhura, të cilat po transportoheshin nga Izraeli për në SHBA. Gjatë një kontrolli të rastësishëm të kryer nga inspektorët e Departamentit të Kontrabandës së Doganës së Aeroportit të Athinës, u gjetën pakot e fshehura me gjethet e thara të KHAT-it në magazinën e përkohshme të mallrave të aeroportit.

Sasia totale e sekuestruar arrin në 500 kilogramë, dhe vlera e saj e përafërt është rreth 1,500,000 euro. Kjo është sasia më e madhe e KHAT-it të sekuestruar ndonjëherë në aeroportin e Athinës, duke kaluar edhe sasinë e mëparshme të zbuluar, 458 kilogramë, në vitin 2014. E fundit në vitin 2022, një sasi prej 34 kilogramësh u sekuestrua gjithashtu në të njëjtin aeroport.

Ky zbulim thekson vazhdimin e luftës kundër trafikut të substancave narkotike dhe përpjekjet e autoriteteve për të frenuar përhapjen e këtyre drogërave të rrezikshme.