Italia ndodhet në gjendje alarmante për shkak të përhapjes të Coronavirusit. Sistemi shëndetësor dhe urgjencat të cilat kanë përgjegjësinë më të madhe po kalojnë pengesa për dhënien e ndihmës së shpejtë në kohë.

Referuar mediave të huaja,ambulanca arrin pas 7 orësh tek qytetari i cili njofton se ka simptoma të COVID-19 ende pa kryer testin e tamponit. 

Kështu u ka ndodhur shumë të prekurve në Bergamo, rajon i cili është kthyer në epiqendren e përhapjes së coronavirusit në Itali.

Ekipet e emergjencës u shprehen se është thuajse e pamundur t’u përgjigjesh të gjithë kërkesave për ndihmë nga qytetarët në të njejtën kohë. Sipas tyre, ka pasur ditë me më shumë se 400 mijë telefonata.

Për këtë arsye, janë vënë në dispozicion dy linja telefonike: një për urgjencën ndaj coronavirusit dhe tjetra për dyshimet dhe pyetjet që mund të kenë qytetarët lidhur me pandeminë COVID-19.

Punonjësit e ndihmës së shpejtë shtuan se pas cdo pacienti të cuar në spital, u duhet të kryejnë dhe dezinfektimin e automjetit të ambulancës dhe sigurisht që ky veprim kërkon kohë. 

Nga ana tjetër, gjendja e një të infektuari mund të përkeqësohet dhe ndihma e shpejtë luan rolin thelbësor në shpëtimin e jetës së tij.