Italia në prag të zgjedhjeve, Letta progresist, të rinjtë kundër Melonit

Italia është e përfshirë nga debatet politike në prag të zgjedhjeve të shtatorit, që kanë si protagonistë kryetarin e Partisë Demokratike, Enrico Letta përballë kryetares së të djathtës ekstreme Giorgia Meloni, e mbështetur nga kryetari i Ligës së Veriut, Matteo Salvini dhe ai i Forza Italia, Silvio Berlusconi.

Nga ana e tij, Letta shprehet i gatshëm për dialog, ndonëse jo me të djathtën. Ai i ka lënë dyert të hapura për Lëvizjen 5 Yjet, e udhëhequr nga ish-kryeministri Giuseppe Conte.

“Është më e thjeshtë të dialogosh me Conten sesa me Salvninin dhe Melonin. Megjithatë, do të shohim cili do të jetë rezultati dhe pastaj do të bisedojmë”, ka deklaruar Letta.

Në një intervistë radiofonike, ai është shprehur se puna, taksat dhe të drejtat e njeriut janë thelbi i procesit elektoral, që vjen pas rënies së qeverisë së Mario Draghit.

“Në zgjedhje duhet të shkosh majtas ose djathtas. Ne duam t’u japim italianëve një alternativë për ata që besojnë se një Itali e qeverisur nga Meloni dhe Salvini do të shënonte një prapambetje”, ka vijuar Letta.

Nga ana tjetër, kryetari i Ligës së Veriut, Salvini, ka propozuar modelin hungarez, konkretisht ato të kryeministrit Viktor Orban, për mbrojtjen e familjes.

“Nuk ka asnjë dyshim që ligji më i avancuar për familjen, ai që po jep rezultatet më të mira në nivel evropian është ai i Hungarisë. Nuk e them këtë sepse është Orban, po të ishte ligji më i mirë në Francë, do të përmendja Francën”, ka thënë Salvini.

Ndërsa Berlusconi, i cili ka dalë kundër përballjeve televizive, ka vlerësuar se është më mirë që secili lider të ilustrojë në mënyrën e vet programin e tij.

Ndërkohë, kryetarja e Vëllezërve të Italisë, Giorgia Meloni ka hasur në rezistencën e blogeres së njohur të vendit fqinj, Chiara Ferragni lidhur me abortin.

Përmes një postimi në rrjetet sociale, Ferragni, e njohur për influencën tek rinia italiane, ka deklaruar se e djathta ekstreme do ta ndalojë një praktikë të tillë.

“Vëllezërit e Italisë e kanë bërë të pamundur abortin në Marke, rajoni ku qeverisin. Kjo rrezikon të kthehet në politikë kombëtare nëse e djathta fiton”, është shprehur Ferragni.

LEXONI GJITHASHTU:

• Meloni nis fushatën, kryetarja e ekstremit të djathtë kundër BE-së dhe emigrantëve
• Italia redukton varësinë nga gazi rus