Italia nuk do të marrë pjesë në Bordin e Paqes së Trumpit

Italia nuk do të marrë pjesë në “Bordin e Paqes” të Presidentit të SHBA-së, Donald Trump, raportoi të mërkurën gazeta Corriere della Sera, duke përmendur shqetësimet se bashkimi me një grup të tillë të kryesuar nga udhëheqësi i një vendi të vetëm do të shkelte kushtetutën e Italisë.

Plani i Trump deri më tani ka tërhequr reagime të kujdesshme nga aleatët perëndimorë, pasi diplomatët thonë se mund të minojë punën e Kombeve të Bashkuara.

Të enjten, Trump pritet të kryesojë një ceremoni për të festuar Këshillin e ri në Davos të Zvicrës, ku po zhvillohet Forumi Ekonomik Botëror.

Sipas Reuters, kryeministrja italiane Giorgia Meloni, një udhëheqëse e krahut të djathtë që ka marrëdhënie të mira me Trump, nuk ka gjasa të shkojë në Davos.

Këshilli i propozuar do të kryesohet nga Trump dhe do të filloj duke trajtuar konfliktin në Gaza përpara se të zgjerohej në luftëra të tjera. Vendet anëtare do të duhej të paguanin një tarifë prej 1 miliard dollarësh secila për të fituar anëtarësim të përhershëm.

Sipas kushtetutës italiane, Italia mund të bashkohet me organizatat ndërkombëtare që sigurojnë “paqen dhe drejtësinë midis kombeve” vetëm “në kushte të barabarta me shtetet e tjera “, një kusht i papajtueshëm me supremacinë e SHBA-së në këshillin e ri, sipas Corriere.

Ftesat për t’u anëtarësuar në këshill u janë dërguar rreth 60 vendeve, por vetëm disa, përfshirë Hungarinë dhe Izraelin, deri më tani i kanë pranuar pa rezerva. Duke shtuar shqetësimet midis aleatëve perëndimorë, Kremlini tha këtë javë se edhe Presidenti rus Vladimir Putin ishte ftuar.