Shtetasit italianë gjejnë dy predha në lumin Buna

Një grup italianësh të cilët po lundronin në ujërat e lumit Buna, kanë gjetur 2 predha në afërsi të urës së vjetër.

Sipas burimeve të deritanishme, shtetasit italianë kanë përdorur magnet për të nxjerrë predhat nga ujërat e lumit dhe menjëherë kanë lajmëruar policinë vendore të Shkodrës. Efektivët menjëherë kanë mbërritur në vendin e ngjarjes duke bllokuar kalimin e qytetarëve në urën e vjetër të Bunës për të shmangur çdo lloj rreziku.

Është ende e paqartë se cilës periudhë i përkasin dy predhat e gjetura. Një prej predhave është e përmasave të mëdha ndërsa tjetra është pak më e vogël. Tashmë pritet ardhja e forcave xheniere nga Tirana për të bërë të mundur demontimin e tyre.

Kjo nuk është hera e parë që në zona të ndryshme të qarkut Shkodër gjenden predha të përmasave dhe periudhave të ndryshme, që nga Lufta e Dytë Botërore apo edhe nga viti 1997.

Mendohet se shumë të tjera vijojnë të jenë në lumenj, liqene apo edhe të groposura rrëze kodrave e maleve të ndryshme apo edhe tunele nëntokësore në gjithë vendin.