Izolimi në 41-BIS, Shullazi dhe Dani kallëzojnë penalisht ish-kryeprokuroren Marku dhe Donika Prelën

Emiljano Shullazi dhe Gilmando Dani i janë drejtuar Prokurorisë së Posaçme, SPAK me një kallzim penal kundër ish-Kryeprokurores së Përgjithshme Arta Marku dhe ish-drejtueses së Prokurorisë së Krimeve të Rënda Donika Prela, të cilat sipas Shullazit dhe Danit kanë shpërdoruar detyrën me futjen e tyre në regjimin e izolimit 41-BIS.

Dy kallzuesit arsyetojnë se Drejtuesja e Prokurorisë së Gjykatës së Shkallës së Parë, Donika Prela i ka tejkaluar kompetencat e saj me kërkesën për izolimit të tyre, të cilën ligjërisht duhet ta ushtronte Drejtuesi i Prokurorisë së Posaçme.

“E kallzuara Donika Prela, e mbështet kërkesën e saj në Udhezimin Nr.2, date 24.05.2019 të Prokurorit të Pergjithshëm të Përkoheshëm në atë kohë, të kallzuares Arta Marku. Marku, në kundërshtim me përmbushjen e rregullt të detyrës nga ana e saj, ka shkelur Kushtetutën e Republikes se Shqiperisë duke nxjerrë një udhëzim në kundërshtim me ligjin,” thuhet në letrën e dy paditësve, të cilët aktualisht po gjykohen nga Gjykata e Posaçme e Apelit për Korrupsionin dhe Krimin e Organizuar.

Emiljano Shullazin dhe 4 anëtarët e grupit të tij që akuzohen për gjobëvenie dhe shkatërrim prone nga prokuroria ishin të burgosuri e parë që iu nënshtruan regjimit 41 BIS.