Izraeli arreston grupin e dytë të spiunëve të Iranit

Shtatë persona janë arrestuar në Jerusalemin Lindor të pushtuar, nën dyshimin se kanë planifikuar sulme me mbështetje iraniane, sipas shërbimeve izraelite të sigurisë.

Ky rast shënon arrestimin e dytë të tillë brenda pak ditësh.

Agjencia e sigurisë së brendshme, Shin Bet, dhe policia izraelite kanë njoftuar se të dyshuarit kishin në plan të vrisnin një shkencëtar të njohur izraelit dhe një kryetar bashkie, si dhe të bombardonin një makinë policie dhe të hidhnin një granatë në një shtëpi.

Autoritetet raportojnë se për këto veprime ishte ofruar një pagesë prej rreth 200,000 shekels (rreth 53,000 dollarë).

Arrestimet vijnë vetëm një ditë pas njoftimit se shtatë izraelitë të tjerë ishin ndaluar për dyshimin e spiunazhit në favor të Iranit.

Tensionet mes Izraelit dhe Iranit janë intensifikuar vitet e fundit, me Izraelin që ka premtuar hakmarrje pas një sulmi raketor iranian më 1 tetor.

Sipas njoftimeve, grupi i arrestuar drejtohej nga një 23-vjeçar, i cili dyshohet se ishte rekrutuar si operativ iranian.

Ai ka pranuar se ka kryer “veprimtari terroriste” për arsye nacionaliste.

Shin Bet dhe policia nënvizuan se shkencëtarët dhe zyrtarët e tjerë të shquar janë objektiva të agjentëve iranianë dhe se do të vazhdojnë të punojnë për zbardhjen e aktiviteteve të tilla.

LEXONI GJITHASHTU:

• Sulmi izraelit në spitalin e Berjutit| Vriten katër persona, plagosen 32 të tjerë
• SHBA kërkon që lufta Izrael-Hezbollah të përfundojë “sa më shpejt që është e mundur”