Izraeli paralajmëron sulm në jug të Bejrutit

Ushtria izraelite ka lëshuar një paralajmërim të ri për banorët në periferitë jugore të Bejrut, duke u kërkuar të largohen nga shtëpitë e tyre përpara një sulmi të mundshëm.

Zëdhënësi në gjuhën arabe i ushtrisë izraelite, Avichay Adraee, deklaroi se banorët që ndodhen në një ndërtesë të caktuar dhe në zonat përreth duhet të evakuohen menjëherë, pasi sipas tij ndodhen pranë një objekti të lidhur me Hezbollah.

Në një postim në rrjetin social X, ai publikoi një hartë të zonës së Ghobeiry, ku ishte theksuar me të kuqe ndërtesa që konsiderohet objektiv i mundshëm.

Autoritetet izraelite nuk kanë dhënë prova të mëtejshme për pretendimet, ndërsa situata në zonë mbetet e tensionuar mes frikës për një përshkallëzim të ri të konfliktit.