‘Janë kursimet e prindërve’, GJKKO rrëzon kërkesën e ish-gjyqtares për kthimin e parave që iu sekuestruan në banesë

Gjykata e Posaçme kundër Korrupsionit dhe Krimit të Organizuar, GJKKO rrëzoi kërkesën e ish-gjyqtares së Krujës Enkelejda Hoxha, e cila kërkonte kthim të vlerës monetare të sekuestruar në banesën e saj gjatë kontrollit.

Sipas gjyqtares, paratë e sekuestruara janë pensioni dhe kursimet e prindërve dhe u duhen atyre për nevoja jetike.

Në seancë ka qenë e pranishme edhe vetë gjyqtarja e cila mes lotësh ka deklaruar se fëmijët dhe prindërit e saj janë në kufijtë e mbijetesës. Ndërsa prokurorët kërkuan rrëzimin e kërkesës së ish-gjyqtares.

Ish-gjyqtarja e Krujës, Enkelejda Hoxha u arrestua në muajin shkurt të këtij viti me urdhër të SPAK, me akuzën për korrupsion dhe shpërdorim detyre.

Ish-gjyqtarja dyshohet se do të lironte një të dënuar kundrejt një shumë të konsiderueshme parash.

Bashkë me gjyqtaren Enkelejda Hoxha u arrestuan dhe disa persona të tjerë mes të cilëve funksionarë të Gjykatës së Krujës dhe mjeku i njohur, Edvin Prifti.

LEXONI GJITHASHTU:

• KLGJ shkarkon nga detyra gjyqtaren Enkelejda Hoxha
• Apeli i GJKKO-së lë sërish në qeli gjyqtaren e Krujës, Enkelejda Hoxha