Jemen: 20 të vrarë nga bombardimet e Arabisë Saudite ndaj separatistëve

Të paktën 20 luftëtarë separatistë u vranë sot në Jemen nga bombardimet e koalicionit të udhëhequr nga Arabia Saudite, njoftoi një zëdhënës ushtarak i Këshillit Kalimtar Jugor (STC).

Zëdhënësi, i cili kërkoi të mos identifikohej, tha se luftëtarët u vranë në sulmet ndaj bazave ushtarake separatiste në Al-Hasa dhe Sheikhoun.

Burime mjekësore konfirmuan numrin e fundit të viktimave. Më parë, STC, e cila kërkon të rivendosë Republikën Popullore të Jemenit në provincat jugore të vendit, kishte njoftuar se viktimat ishin shtatë.

Pas zgjerimit të tyre të shpejtë në fillim të dhjetorit, forcat STC  tani kontrollojnë zona të mëdha të Jemenit jugor, përfshirë provincën strategjike të Hadramaut. Përparimi i tyre i ka sjellë ata afër kufirit me Arabinë Saudite, një zonë me rëndësi të veçantë kulturore dhe historike për mbretërinë.

Deri vonë, STC ishte një pjesë kyçe e koalicionit që luftonte përkrah qeverisë së njohur ndërkombëtarisht kundër rebelëve Houthi pro-iranianë.

Ky ndryshim i vendosi Arabinë Saudite dhe Emiratet e Bashkuara Arabe në anë të kundërta në luftën civile që shpërtheu në vitin 2014.