Jemi shënjestruar nga Forcat Ajrore Greke, pretendon Turqia

Raketat greke shënjestruan në mënyrë elektronike avionët luftarakë turq F-16 që fluturonin në një mision zbulimi në hapësirën ajrore ndërkombëtare, njoftoi sot agjencia shtetërore turke e lajmeve Anadolu.

Ky është i fundit në një seri pretendimesh turke se Greqia fqinje po synon avionët turq që fluturojnë mbi detin Egje dhe në Mesdheun lindor, sipas AP.

Radari i sistemit raketor S-300 të Greqisë, me bazë në ishullin e Kretës, regjistroi dhe shënjestroi aeroplanët turk më 23 gusht, njoftoi agjencia turke, duke cituar një burim të ministrisë së mbrojtjes.

Avionët turq F-16 po fluturonin në perëndim të ishullit grek të Rodosit kur u aktivizua radari i gjurmimit të objektivit në sistemin rus të mbrojtjes ajrore S-300, shtoi raporti.

Avionët turq përfunduan misionin dhe u kthyen në bazat e tyre “pavarësisht mjedisit armiqësor”.

Askush nuk iu përgjigj thirrjeve të AP në ambasadën greke në Turqi sot.

LEXONI GJITHASHTU:

• Shtohen tensionet Athinë-Ankara, shkak ishujt në Egje dhe Kreta